男團MIRROR成員姜濤剛於4月30日度過23歲生日，當日有大批「姜糖」花盡心思，包括舉行免費乘電車日，又將銅鑼灣變「姜濤灣」設多個打卡位，成千上萬的市民紛紛來拍照及為姜濤慶生，這份心意感動了姜濤，一度親自「落區」在銅鑼灣現身感謝支持及愛護。然而同日姜濤發表第10首歌曲《作品的說話》，是繼《孤獨病》後再執導MV。《作》的靈感，姜濤說是因看到一些關於戰爭的相片，令他有感而發，說完全想像不到如戰爭發生在自己身上會是怎樣，希望借此曲宣揚愛與和平的訊息。
常說「用作品說話」這句的姜濤，指歌名是填詞人小克想出來的：「歌詞方向大改，第二次寫好後小克話用《作品的說話》做歌名，我覺得幾好。大家望落以為今次又係講啲好personal嘅嘢，但其實《作品的說話》係一首關乎所有人嘅歌，用我自己成日講嘅一句說話『用作品說話』去講戰爭。我哋無論係咩種族或級別，都一定唔想要有戰爭。」
拍攝《作》MV，姜濤構思以避難所作為背景，故選在已荒廢的商場拍攝，並請來過百名臨時演員演出，以及加入CG效果，飾演難民並看盡人生百態的他說：「商場代表世界同地球嘅縮影，入面發生嘅一切，例如爭食物、祈禱、爭拗，都會喺有戰爭嘅地方發生。喺商場見到好多殘酷嘅事情，其實所有難民都唔係敵人，冇人係敵對，大家都係無辜，但結局好殘忍。」
《作品的說話》MV：https://www.youtube.com/watch?v=S6hedDGVOGE......
相片來源：姜濤Instagram
Comments