本地天團MIRROR首個演唱會於周一（25日）在紅館揭開序幕，以一身pure white打扮的12子從天而降，跳唱《Innerspace》、《Reflection》及《All in one》，令全場觀眾尖叫不已。全晚12子施展渾身解數，但期間也有蝦碌位，就是呂爵安（Edan）自彈自唱《E先生連環不幸事件》時，發生「不幸事件」，鋼琴冇聲，Edan即揮手求救，經工作人員搶救後終於順利演出，他即發揮搞笑本色說：「咁樣畀我出場法，真係呢！其實呢個係棟篤笑，我都冇講棟篤笑好耐。」他又笑言全晚是他這表演部份最好睇：「我呢part一定最好睇，因為12場得呢場係咁，相信之後11場都唔會發生呢件事，意外一定有嘅。」
勁歌熱舞中，也有「洋蔥位」，成員Frankie（陳瑞輝）的感性獨白感動全場。Frankie一直被指是性格被動的「隱形人」，工作量也相對少，但在劇集《IT狗》飾演「Never」一角卻令人眼前一亮，他哽咽的說加入MIRROR後曾一度迷失，連自信心都失去。
Frankie說：「隊友愈嚟愈多嘢做，我就喺屋企望住四幅牆等運到 ，窮到要問人借錢過活，愈嚟愈冇自信收埋自己。悲觀嘅樂觀，係我當時嘅價值觀，教我苦中作樂渡過低谷。我見到拍劇呢條路有光，好似呢盞燈好耀眼，直至今年對自己有番希望。」他說30歲時由舞蹈員轉做MIRROR成員，令他覺得「咩都有可能」，他借此鼓勵大家：「大家同我戒一個習慣，就係唔好相信自己做唔到，面對挑戰時，首先唔好放棄自己，而係先相信自己，咩都有可能，never say never。我想向大家借啲嘢，唔係錢，而家唔使借錢，我ok，我係想大家借信心畀我。」
另外，是次演唱會爆出不少是非，包括實名制安排混亂及公開發售門票超少外，有傳舞台有太多機關，綵排時有舞蹈員發生意外，但有人把責任推往舞蹈員身上，令多位舞蹈員不滿並在ig表達不滿：「用我哋條命去滿足你哋嘅自私自利。一次事故睇清人性醜惡」、「畀番少少專業，帶個腦返工，話晒都食鹽多過人哋食米，唔好吓吓都話執生」、「自跳舞以來，感受最差一天。」
Comments