出道至今踏入第27個年頭的楊千嬅，在本月18日晚上發布個人紀錄片《I · II · III MY STORY》，記錄她由一個寂寂無名的護士，到今時今日成為無人不識的華語樂壇歌手，她說想借短片去感謝成長旅途上所有伙伴及歌迷給她的支持。歌神陳奕迅（Eason）也有現身在片中，分享27年前因大家參加新秀歌唱比賽時而認識：「1995年6月25日參加第十四屆新秀歌唱大賽認識楊千嬅，而家諗返佢都幾倔強，佢係一個幾唔係成日笑嘅女仔，呢個就係當時吸引到我嘅地方。」因參賽關係，當時幾乎每日都會見到對方，Eason說覺得千嬅比較「男人」：「咁多年佢都冇變過，都係嗰啲『喂！陳奕迅！』，其實我覺得有少少粗魯㗎！佢應該係我呢行識得最耐，由未入行到做到而家，25年嘅一個朋友。」他說雙方曾因意見不合致有磨擦：「永遠都會拗，我講東佢講西，我唔知佢有冇，我就真係有嬲！我會覺得，你會識得多過我？尤其是我細個，我細個假假地都係皇家音樂學院，有文憑，我係八級聲樂喎，同我拗？哈哈！」
《小城大事》是千嬅其中一個代表作，原來她曾一度「拒唱」：「當時我唱咗好多小調，想唱一啲rock啲嘅歌曲，《小城大事》講嘅愛情係比較成熟，可能當時我對愛情嘅觀感係停滯不前、有唔好嘅經歷，唔想面對『吻下來，豁出去』呢種想法，會覺得：『做乜啫？』有好多情緒去抗拒，會用情緒去選擇工作，但係Paco永遠企喺理性嗰邊，佢話：『呢隻歌唔係你想像中咁簡單，呢隻歌係難，如果你可以handle到呢隻歌，你就係move on咗。』估唔到呢20年做騷時，我好開心原來所有人好想聽到《小城大事》或《處處吻》，好彩有Paco，我冇錯失咗呢個機會。」
由最初父母不大贊成入行，直至現在無人不識，千嬅坦言昔日真的是靠「心口有個勇字」：「當初嘅平凡對我來講，其實我唔理解，我唔知道果啲叫平凡，因為當我得到好多批評嘅時候，我會覺得係唔係我唔夠好。我唔係特別生得靚、冇幾千萬後台，只係心口得個『勇』字，因為我相信用『爭氣』兩個字去強迫自己，死都要練好，死都要點點點，甚至走到今日，我望返轉頭原來當初嘅unknown同咁冇自信先係人哋最欣賞嘅地方，就係所謂嘅平凡。」期間千嬅一度感觸得眼濕濕：「呢啲無數嘅平凡，好難搵番轉頭，原來平凡係咁唔平凡嘅一件事，即係人哋唔會再以平凡嘅角度去睇我，因為我好想我個仔平凡！」
楊千嬅紀錄映畫《I · II · III MY STORY》：https://youtu.be/RQEFf__bwck
相片來源：楊千嬅微博, 短片截圖
Comments