MIRROR成員陳卓賢（IAN）和鄭伊健、許恩怡和蔡思韵主演、梁禮彥執導的新片《久別重逢》將於12月20日上映，故事講述一位音樂人面對創作瓶頸，選擇逃避而展開的一次療癒旅程，道盡種種期盼與遺撼。鄭伊健和陳卓賢飾演不同人生階段的「蘇昇華」，而電影預告片已公開。
鄭伊健所飾演的「蘇昇華」是陷入鬱鬱不得志的狀况，在失眠和酒癮下令他開始選擇逃避，伊健指自己最被預告片中的「夢想」留下深刻印象，寄望大家在年輕階段應該更為勇於嘗試：「預告片入面嘅夢想，令我感受最深刻，相信每個人年青時都會有自己嘅夢想，同故事嘅主角一樣。因為你已經有咗好多唔同嘅人生經歷，喺成長咗嘅階段，望番青春嘅自己，你會發覺好多事情，其實可以放膽，為自己努力爭取機會，盡量嘗試。」
Ian飾演的少年蘇昇華對音樂充滿熱情，對未來充滿憧憬，Ian說︰「睇到預告片勾起回憶，唔知點解感覺幾年前已經完成拍攝，回憶好似喺好遠好遠之前，但係其實唔係拍完好耐。人生有趣嘅地方，係永遠唔會知道將來嘅自己係點。即使我睇到另一個階段嘅自己，喺電影入面出現嘅時候，現實生活中我都冇去諗將來嘅我會係點，反而係想專注喺目前嘅嘢。」
另外，今年以故事串連推出單曲的Ian，在2024年完結前推出最後一首作品《玩偶奇遇記》，終於揭曉他在故事中所飾演的主角，原來是一隻玩偶熊仔。
玩偶熊仔見證著一段愛情的開始、發展到終結，隨後亦有他自身的經歷，不過熊仔既無話語權，亦未能表達自己的意願。
選擇玩偶熊仔作為故事主角，Ian解釋：「因為人畜無害，同埋好多公仔都係熊仔，大家好多時會忽略咗佢，覺得佢嘅存在係理所當然，睇呢個故事嘅時候，亦唔覺得隻熊仔係關事，純粹覺得熊仔係定情信物，見到熊仔就好似見到你嘅另一半，但慢慢緊扣返主題：其實熊仔喺MV裡面有唔同形態出現，亦都係代表每一種心情，不過熊仔有很多無能為力嘅事，譬如佢都好鍾意主人，但言語上、肢體上都表達唔到自己。」
透過今年這個故事，到《玩偶奇遇記》將故事揭盅，Ian最希望能給大家一點提醒：「希望可以提醒大家，其實生活上唔係所有嘢都理所當然，可能有時要諗闊少少諗遠少少，所有嘢得來不易，要多啲喺唔同角度去諗。」Ian更指玩偶熊仔亦是他個性投射：「我都係一個唔太會表達自己嘅人 ，所以出一個咁嘅故事，睇下會唔會都有啲有共鳴嘅朋友。」
Comentários