超人氣男團MIRROR現正忙於世界巡迴演唱會，原本月底將到馬來西亞及新加坡巡唱，但今日（18日）馬來西亞主辦方宣布，原定4月28日舉行的一場，因「演唱會無法預料的情況」下要取消。至於5月1日於新加坡室内體育館舉行的演唱會將如期舉行。
雖然巡唱行程有變改，但無阻「教主」盧瀚霆Anson Lo的新歌《深閨》發布！原來Anson Lo早前完成英國站巡唱後，與團隊到巴黎拍攝MV。《深閨》由徐浩作曲、監製，黃偉文填詞，是Anson Lo暫時最喜歡的一首慢歌作品。
歌詞道出當愛上一個人之後，可以為對方變成一個黐家的人，被對方獨佔，甚至放棄名利。Anson Lo坦言歌詞完全說中了他的心態：「歌詞其中一句：『拒絕再做凡間千人迷』，好Relate到自己，同埋佢令我思考到，如果有一日我真係拍拖，係咪要放下自己工作上嘅Anson Lo？係一首好Personal嘅慢歌，所以我喺錄音室唱嘅時候係有唱到喊。」
Anson Lo說如果拍拖，都應該幾似Wyman所寫，會全神貫注於對方身上：「因為我係巨蟹座，係一個Home Guy（住家男人），好鍾意留喺屋企，拍拖的話，放工都會即刻返屋企，然後喺屋企食飯睇戲，瞓覺攬埋一齊；假期都未必出街，兩口子一齊煮下嘢食飲杯咖啡，就已經好好。因為如果我鍾意一個人，都好想24小時黐住佢，做乜都OK。」
對於Anson Lo來說，《深閨》所說的愛情觀與他本人很吻合，但他相信，歌詞同樣說中了大眾當情到濃時，對於愛情的執迷與痴迷，他相信大家聽到歌詞，一樣會身同感受。
揀選巴黎拍MV，全因巴黎是既浪漫、Fashion又Cozy，和《深閨》裏的愛情，同樣浪漫及無拘無束，加上從倫敦到巴黎只需個多小時，所以是不二之選的拍攝地。Anson Lo最喜歡在巴黎鐵塔拍攝的場口：「夜晚可以睇到巴黎鐵塔唔同嘅燈光閃法，好靚！同埋我哋拍攝嘅地方只係隔住一條河仔，可以好近咁望到巴黎鐵塔，又大好靚，又襯首歌，而家可以拍埋入MV裡面，有剔咗Bucket List嘅感覺。」
被問到又要巡演又要拍MV，體力上可以應付得到，Anson Lo坦言：「每次都係同自己講，應付唔到都要應付，因為做完巡演，話唔攰都係講緊大話，但只要每次做嘅嘢，都係自己好期待嘅作品，攰就唔係咁大問題。」
首次踏足巴黎，Anson Lo說有趁空遊覽：「有周圍睇下名勝、景點，買咗少少嘢，又有探索下啲Café，坐低飲下嘢食下嘢，又或者喺條街行下。其實今次巡演又好，喺巴黎拍MV又好，最鍾意做嘅嘢唔係買嘢，而係喺條街度行，因為喺香港一落樓就上車去工作目的地，好少喺條街度行，我好想喺唔同國家嘅街上面行，感受下嗰個國家嘅Vibe係點樣，可以見到好多人唔同嘅面貌，做人處事方式，都會好好奇，齋行都好有趣好好玩。」
Comments