MIRROR成員呂爵安（Edan）踏入2023年推出全新R&B作品《LOVERSE》，在MV中化身外星人，與地球人發展超友誼感情。Edan第一次接觸R&B，為有完美效果，花了7天 灌錄，是繼《E先生連環不幸事件》之後灌錄時間最長的一次。
首度與周耀輝合作的Edan，說歌名加入元宇宙概念：「《LOVERSE》係講愛對人類好緊要，愛喺全宇宙都係一個共通語言，喺任何地方都會發生，係一件永恆嘅事情。」他對其中兩句歌詞有特別看法：「愛就要笨到像天才 / 愛就要大到成為大愛」他說:「愛未必好logical，未必好有原因，有時可能會好蠢，但呢個就係愛嘅精神，唔好諗太多，唔好估太多。希望呢個世界多啲愛，每個人都可以多少少愛或者大愛啲，成個世界會開心啲，大家都會舒服啲。周耀輝老師寫嘅詞同我嘅理念好接近，所以好鍾意!」
Edan說在MV中扮外星人是想有突破，扮外星人不易，漂白了頭髮，以及配戴Colour Con，他說曾擔心角色欠說服力：「唯一少少擔心自己做外星人會唔會好傻仔？因為全被女主角lead住做一啲嘢，乜都唔識咁。希望出嚟感覺大家會覺得幾得意，亦希望俾到大家想像空間，想像如果倒數時有個外星人喺背後出現，會係點呢?」
要在一天內完成MV拍攝，要走景及轉造型，Edan說是頻辛苦：「今次最攰係戴colour con，不嬲戴con都唔可以戴好耐，會好攰好拮眼，加上前兩日開始喉嚨痛，有少少發炎，有少少感冒，好在有keep住食藥，我比較擔心女主角多啲，因為有幾個鏡頭同我好近距離，我同佢講都應該病硬。」
對於今年的展望，Edan笑說要變「靚仔啲」：「2023年希望出多啲唔同種類嘅歌。其實都袋住咗啲歌好想出，亦都係風格好唔同，希望可以儲多啲唔同種類嘅歌。另外就係繼續唱多啲歌，變靚仔啲，做戲做好啲！祝大家2023年新年快樂，希望大家可以勇敢去愛，搵到自己所愛，活喺呢個充滿愛嘅宇宙入面，同埋記得聽《LOVERSE》!」
Comments