MIRROR成員邱傲然（Tiger）獲邀為《第十七屆鮮浪潮國際短片節》拍攝開幕短片《是日精選》，楊樂文（Lokman）、李駿傑（Jeremy）、江𤒹生（AK）及陳瑞輝（Frankie）兄弟團幫拖演出。首次做導演的Tiger一試愛上，更自爆：「玩大咗！」因片中有多場飛車及打鬥場面，對初做導演的Tiger來說當然不易。
由前期到後期都跟到足、就連度橋、打燈、剪片、配樂、調色等崗位都有參與的Tiger說：「拍完之後睇片再抽身諗，就會覺得有啲貪心，可能少啲、精啲可能會再好啲，但冇辦法，第一次就好興奮，想將鍾意嘅嘢擺晒落去。每一個職位都環環相扣，缺少一個部份，條片就會爭啲嘢。每個人都有Input，會令條片更加豐富。成個製作過程我都好開心同享受，因為個個都好有火，成班前輩唔係當返工，真係想做好件事，成個過程可以回憶一輩子。」
Tiger自言拍上癮，期待有下一次拍攝機會，並說正籌備下一個project：「會睇多啲戲、報讀課程，又或者拍戲時遇到唔同導演，會多啲坐喺Mon隔離睇佢哋點樣拍戲，有乜又問下大家拍完呢條片，發現自己都幾鍾意呢件事，真係好玩！雖然係好大壓力好緊張，但過程真係好enjoy！（想過幫MIRROR拍MV？）要佢哋搵，唔係我話拍就拍，MV 同 劇情片係兩個出發點，MV要好商業化，劇情片就未必需要，所以成個方式同System都好唔同，但我好期待有兄弟搵我，我亦會瞓身做！」
Lokman見證Tiger全程投入賣力，讚不絕口：「老虎好清楚自己想要啲乜嘢，又以真誠相待所有工作人員，例如燈光師做完個燈俾佢睇，會真係大家一齊研究，然後可能推介少少做法俾佢，唔啱佢心水又會直接講，所以大家同佢夾得好舒服，呢個係佢做導演嘅一個優點，好有自己嘅想法，係佢犀利嘅地方。人仔細細，可以lead到現場所有人。」演出《是日精選》後，Lokman說發現自己有個死穴，說：「打交係弱點，唔係好敢打人，仲未突破到。我真係好怕打親人。」願意接演任何角色的他，直言最想挑戰的是扮女人：「演女仔完全係第二樣嘢，可以試下例如《翠絲》姜皓文演嘅跨性別人士，又或者係同志角色，都想一試。」
在片中演劫匪的Jeremy、AK及Frankie為配合角色，奉旨粗口橫飛，Tiger力讚Jeremy夠「流利」：「好多謝佢傾力瞓身演出，我都好surprise，佢講得真係好好，佢真係有練過，好純熟，好有嗰陣味道，好開心佢有呢個突破，希望佢多啲呢方面嘅突破，我相信大家都會好鍾意睇。」
Comentários