MIRROR成員呂爵安(Edan)推出新作《月光奏明曲Moonlight Sonata in “E” minor》，打破以往在MV型仔登場的作風，以邪惡造型拍攝，而歌曲唱出以偏概全的社會病態。
歌名自然聯想到貝多芬的《月光奏鳴曲》，Edan說：「呢首歌已經做咗成年，當時係想做一首Classical加跳唱嘅作品，跟住就揀咗貝多芬《月光奏鳴曲》。我哋再諗用月亮去延伸，諗下講咩好：月亮本身唔識發光，只係因為太陽嘅照射，人類喺地球上望上去，先見到月圓月彎唔同形狀，但佢本身係暗黑球體。我哋想藉此比喻喺資訊咁發達、速食嘅社會，睇每一件事就好似太陽照落去，佢係咩形狀就係咩形狀，唔會細心用時間去研究。」
填詞人T-Rexx筆下的歌名，「鳴」變了「明」，有道出真相的含意，而英文名亦將歌曲原本C Sharp minor的調子，變成了E minor，Edan說：「E就代表Edan，而Major、Minor平時喺音樂上有大調、小調意思外，其實亦有主流、非主流嘅意思，而今次歌曲係屬於Edan一啲Minor嘅想法，所以就用上E minor。喺Intro同Ending都係用咗貝多芬《月光奏鳴曲》，以前學琴都有彈過，而且咁啱都係同一個Key，練起上嚟都好快，但中間嘅鋼琴Solo的確有啲考起我，希望有一日可以表演到呢一Part俾大家睇啦！」
MV中不乏跳唱畫面，Edan說有好多長鏡頭跳舞場口：「好似喺枱上面，或者喺皇座上面，都係一Shot落跳舞，另外有對翼喺好混亂嘅狀態等等，以往都係比較少嘗試，所以今次體驗真係好在喺呢幾年對表演同跳舞，都有少少嘅進步，今次先Handle到呢啲嘢，如果唔係以前嘅自己應該做唔到而家MV想表達嘅嘢，當然可以做得好好多，但呢個Timing都係幾有趣，希望大家都鍾意。」
Comments