樂壇天后鄭秀文（Sammi）將於7月在紅館舉行《You & Mi 鄭秀文世界巡迴演唱會香港站2023》8場演唱會，下周一（8日）早上10時起可透過指定信用卡優先訂票，定必掀起全場搶飛潮！而Sammi為個唱所拍的海報，同樣成為熱話！
Sammi拍海報時所穿的大露背兼超高衩長裙，型到爆裂，更是挑戰性感極限，完全是挑機「裸」命之作，非任何人都能駕馭，而Sammi不單恰到好處，更充份展現苦煉多時的肌肉線條，以及白滑幼細的肌膚，天后駕到的強大氣場，擋也擋不了！
雖然拍攝海報非新鮮事，但Sammi依然做足準備，她說：「我今日心情又興奮又緊張，好希望拍到一輯好理想嘅海報，無論概念、造型、服飾、攝影，甚至耳環都好講究，帶出不一樣感覺畀觀眾，大家睇到就會明白。拍攝前做好皮膚護理、瞓好啲等基本準備。呢條裙確實有少少難着，因為剪裁特別又好多元素，有舞台感、高貴感，仲有啲Punk，一套衫有咁多元素好特別，所以我都要做好身型管理。結果無問題，已經過咗一關啦，我好滿意！」
Sammi自言以前在飲食上比較節制，現在則改變心態，一切隨意。看似佛系，但始終不變的一個習慣，就是持之以恒的做運動：「我試過168（每天進食8小時）、甚至204（每天進食4小時）飲食法，但有時好想食都會照食！依家好隨心，無限定一個食嘢方式。如果需要着套衫修身啲，飲食就檢點啲，如果套衫輕鬆啲，我有時會一日食三四餐，最緊要做運動，食多啲都唔怕！」
至於對演唱會的期望，Sammi非常重視每項細節，包括演繹方式及服裝等，最重要是令樂迷享受多元素演唱會：「我諗嚟睇Sammi演唱會嘅歌迷，心目中對呢方面都有要求，希望多啲嘢睇、多啲元素。服裝造型，我都好鍾意着靚衫，好鍾意Fashion，所以呢方面一定唔缺少。至於歌曲和音樂部份，我同音樂監製梁基爵咁多年夾得好好，我哋都想做到多嘢聽同睇，我好鍾意一個演唱會內有不同元素，亦都係我自己做演唱會嘅方向。」
Comments