現年68歲的影星周潤發昨日（19日）參加首屆港珠澳大橋香港段半馬拉松，跟約8千名「跑友」一起參與，首次參加半馬比賽的發哥，最終以2小時27分56秒完成挑戰組賽事。發哥賽後接受訪問，表示今次比賽於港珠澳大橋舉辦非常有意義，又稱已達到大會目標時限之內，故對成績感到滿意，他笑言：「出年都會見到我呀！感覺好舒服，天公造美，又唔係太曬，有啲海風，我第一次跑算係咁。跑就唔攰，係同啲人打招呼攰，一路叫住『發哥加油』，我就不停『多謝』！」
發哥笑言因黎明說「唔好空肚食早餐」，所以連水都不敢飲，怕中途要排隊去廁所，並透露明年1月再挑戰半馬，沒想過跑全馬：「我嘅體力應付唔到5小時嘅運動，兩個半小時已經係極限。」笑言現在不做演員、轉做運動員的他，說有留意楊紫瓊和梁朝偉先後在國際電影頒獎禮上奪獎，問他可會「出山」和楊紫瓊和梁朝偉合作，他說：「有機會嘅，有希望嘅，如果冇，咪繼續跑步，我暫時未有戲拍，跑住步先。我今日攞咗兩個牌，一個係證書，一個係兩個半小時內完成嘅獎牌，如果唔得，我就打算喺淘寶淘兩個返嚟。」
問到會否邀請藝人朋友一起跑半馬，發哥即耍手擰頭：「要佢哋肯先得，佢哋多嘢做嘛。人哋要搵食，要畀時間人哋瞓覺先得，拍戲要捱更抵夜，唔夠精神跑，真係會死，唔係講笑！」至於可會邀請好友鄭裕玲一齊跑，他稱對方忙做YouTuber，又說自己不會考慮加入YouTuber行列：「搞呢啲好忙，要人哋subscribe同撳鐘仔，唔好煩人哋啦。一個人跑步舒服啲。」
Comments