由張敬軒、王菀之（Ivana）、魏浚笙（Jeffrey）、白只、洪嘉豪、黃正宜（阿正）等合演的英皇電影《超神經械劫案下》，於明天（年三十）上映，之前在首映禮及優先場令觀眾反應最熱烈的一幕，是張敬軒、Jeffrey、白只在稻田中忘情裸跑！首度擔正賀歲片的張敬軒，這幕裸奔是從影以來最大膽的一次，他在ig分享一張私藏的與Jeffrey同框的幕後花絮相：「我諗我算係有自信，竟然夠膽喺喱條『木契』（Jeffrey）隔離除衫！我影響市容我對唔住！」
張敬軒更笑說：「從來未試過喺鏡頭前咁無遮無掩，難免有啲尷尬同唔自然，但始終男仔由細到大都會習慣赤膊，而且即場睇拍攝出嚟嘅效果，大家又覺得幾好笑，所以我覺得呢場戲唔錯，極有生物科、人體科學等教育意義，可以睇到人體正常發育嘅三個階段！拍之前有討論過，使唔使自己出錢做CG？後來都係肉赤，冇叫電影公司做，依家睇番，我極度懷疑魏浚笙自己畀錢，用CG整啲肌肉出嚟，歡迎各位觀眾，喺電影票房理想時，齊齊嚟驗明正身！」
身為新一代男神的Jeffrey，直言拍這場戲時十分緊張：「知道要拍呢場戲之前，已經加強運動訓練，希望將最好的戲劇效果帶畀觀眾，我諗呢個片段，將會係我人生最大尺度嘅演出！」至於白只則笑說全無尷尬：「嚴格嚟講我唔係全裸，膊頭有條皮草毛毛披喺身，算有啲安全感！跑時冇辦法，我啲脂肪扽吓扽吓，難免有啲破壞美感！不過值得一讚嘅係，阿正相當專業，望住我時仍然有『心心眼』，但她好可能只係借視線，其實係望住軒公同Jeffrey！」
Comments