一共24場的《張學友60+巡迴演唱會》香港站於前晚（10日）在紅館開鑼，這是香港站首場，也是《張學友60+巡迴演唱會》的第67場。首次在紅館開三面台的張學友，以《留住這時光》揭開序幕，之後演繹《Ooh La La 》、《馬路英雄》、《我應該》、《等你等到我心痛》、《深海》、《三天兩夜》等曲，唱《等你等到我心痛》時，播放了張學友與舒淇合演的片段。
期間張學友跟樂迷打招呼：「大家好嗎？山頂嘅朋友好嗎？每次嚟到紅館唔講呢句唔舒服。今次香港場演唱會兩日休一日，其實經過精密計算，咁樣安排係最好。今日係巡迴演唱會第67場，返到嚟香港冇咁緊張，但始終有一種壓力。因為第一次做三面台咁近距離，好想伸手同大家握手。另外一個緊張係，好多朋友睇住我大，60+係一個乜嘢概念？開完半世紀演唱會，今次再開60+演唱會，眨吓眼就已經到咗60歲。」
接着張學友突然表演一字馬：「首先，我係屋企試一試60歲都仲可以做到，開始冇咁驚去諗，我係咪可以開到一個60+演唱會？今次開到非常之開心。今次我係夢想成真，希望大家唔好放棄自己夢想，原來係得嘅！我而家仲諗緊係咪可以開70+演唱會，唔知得唔得㗎，我會一路拉筋。如果大家覺得今晚睇完，下次都仲會睇嘅話，我嘅目標係打破修哥紀錄，90歲仲開演唱會。希望我到90歲嘅時候仍然可以攞住枝咪唱。不如喺度做個約定，如果我可以開到70+演唱會，你哋都要好好保持自己身體健康，7年後再喺呢度見面。」
在安歌部分，張學友唱出《李香蘭》、《她來聽我的演唱會》，張學友説：「其實我好驚，我驚我遞咪出嚟冇人唱，唔知係咪因為今次三面台大家坐得好近，你哋今日唱得特別大聲。我係1985年出第一隻唱片，到1990年大家聽到《每天愛你多一些》先更加認識我。」此時全場大合唱《每天愛你多一些》，張學友既開心又感動，最後以一曲《吻別》為畫上圓滿的句號。
Comments