「軒公」張敬軒前晚（23日）在灣仔會展舉行第3場《REVISIT》演唱會，現場樂迷的熱情令他在encore環節要加碼，共唱了3首歌，才捨得讓他收工！軒公初時唱畢《預言書》後說再見，樂迷不肯離開，一直高呼狂叫近5分鐘，軒公難捨熱情，出場再唱。
此時大批樂迷走到台邊，其中一名歌迷送上紙製的「叱咤我最喜愛的男歌手大獎」，軒公「領獎」後笑說：「多謝聖誕流流送個紙紮畀我，送個木我都唔介意，你知唔知將佢放喺西營盤專門賣紙紮用品嘅舖頭，真係毫無違和感！我會放係我studio，多謝你！無論今年有冇機會上台，我都當我自己拎咗啦！反正現場觀眾都係差唔多咁上下人數！多謝大家！」之後他獻唱《我的天》。
唱了兩首歌後，本來軒公已返回後台，但大批樂迷不停大叫encore，有些本來已離場的觀眾，也急急折返，最後軒公再出場，他說：「先要多謝會展，佢哋啱啱同我講，話我再出嚟都可以，唔加收我費用！你哋咁樣無限安歌，知唔知上次演唱會之後，我已經被行家、歌手、連掃地個姐姐都鬧，話我做壞規矩。」最後他獻唱《 明明他已離開你》後，觀眾才肯真正離開。另外，昨早主辦方開賣所有放寬防疫位，門票即被掃清！
Comments