1997年參選港姐獲季軍後，佘詩曼正式踏足娛樂圈，不經不覺，入行至今達25年，在過去四份一世紀，要說她是「港劇女王」，實不為過，主演的多部經典劇集包括《十月初五的月光》、《帝女花》、《金枝欲孽》、《宮心計》、《天與地》及《使徒行者》等，成就她登上視后寶座，更是港人的集體回憶，而內地劇《延禧攻略》更令擴大其事業版圖。
為了紀念入行25年，鮮有獻聲的佘詩曼，邀請江暉作曲、林若寧填詞，打造入行以來首支單曲作品《前排位置》。憑歌寄意，她希望透過《前》曲，感謝多年來伴着她、幫助她及支持她度過順逆高低的有心人。
佘詩曼說：「話晒入行25年，點都有少少感觸，能夠成為今日的我，單憑我一己之力，絕對冇可能做到。要多謝嘅人實在太多太多！有包容我嘅家人、保護我嘅朋友、鍾意我嘅觀眾、為我無條件付出嘅支持者，當然最重要嘅係畀我機會、一齊共事嘅每一個你！慶幸沿途有你，珍惜你嘅出現，感謝你哋成就咗我，永遠畀我『前排位置』。所以忽發奇想，將我心入面嘅感激同心聲都寄意喺歌詞，送畀我遇到嘅每一個你！一份遲來嘅25周年紀念禮，希望你哋鍾意。」
佘詩曼笑說今次推出新歌是非常大膽的決定：「真係冇諗過自己會咁做，好大膽，要將一隻歌唱得好聽已經好難，但係原來由構思去到製成品，呢個過程仲難。其實隻歌原先打算七月出街，點知搞到而家先正式完成，好彩仲趕得切喺2022年送俾大家！」
Comments