李克勤前晚（20日）在紅館舉行尾場的《弦續李克勤‧港樂演唱會》，在encore環節連唱3首歌，過萬名觀眾開手機製燈海，令他非常感動：「我要記住呢個畫面，我覺得我好幸運，我只係一個好喜歡唱歌嘅人 ，唱歌可以成為職業，好珍惜大家對我嘅愛護。」
全晚另一高潮，是劉德華擔任壓軸嘉賓，和李克勤合唱《如果有一天》及《我恨我痴心》，李克勤說：「我問過佢，你情願人讚你靚仔，定係讚你唱歌好，演戲好，佢話靚仔！我但凡有咩奇難雜症，我都會去搵呢個人，遇上困難佢係我明燈！」
身為李克勤「明燈」的華仔，自爆5年前個唱腰斬留陰影，今次再踏紅館舞台心驚驚：「驚呀！上一次我都係唱《如果有一天》，我吊喺上空兜咗一個圈，就要同大家講下次再見。所以今日再唱呢隻歌，對我嚟講係好有意義，但又好驚，個心慌好驚，個心慌㗎！」而他更預告很快回歸紅館！
演唱會後李克勤受訪，笑言自己可能是香港開埠以來，在紅館收得最多利是的歌手，至於尾聲時有否感動到喊，他說：「的確係好感動，但男人老狗老真係盡量唔想喊。」對於歌迷舉寫着「禁止李克勤退休」的燈牌，他笑說：「佢哋好驚我退休，大家唔駛擔心住，我家庭負擔重，唔會退休住。」
Comments