【
歌手KAHO（洪嘉豪）首個紅館個人演唱會，將於4月13日至14日舉行， 開兩場個唱的他，門票優先訂購未開始，近日已傳出門票超額搶購，故今次不會有內部認購，全行怨聲載道：「有冇搞錯！」
據知KAHO的個唱內部超額搶購，是因為他為兌現承諾，主動向公司提出優先給予歌迷會「院友」訂購， KAHO說：「我承認係錫班『院友』嘅，咁叫得人入會，我冇理由詐騙嘛，第一次紅館一定要首先開咗畀佢哋買先啦，啲飛竟然係一開就已經賣完，仲係有人話買唔到....唉，我已經盡晒力。好多朋友問我買飛，我都係嗰句，真係對唔住，係買唔到，我都冇飛，大家想買，真係要喺1月17 號優先訂購嗰日去搶，然後優先訂購搶唔到，就要留意公售。我自己都要搵人去買優先訂購，同大家一齊搶公售，買番啲飛返來畀朋友，屋企人。」
另外，個唱海報一出，同樣令「院友」瘋狂，狂讚海報中的KAHO靚仔到冇朋友，KAHO笑說：「我自己都覺得真係幾靚仔，哈哈！都差啲認唔到自己。真係要歸功於設計師、造型師，用一個咁簡約嘅設計，但又做到一張咁出色嘅海報。點撲到張海報？我已經決定叫公司推出紀念品嗰陣，要有埋海報畀大家買，今次啲紀念品都靚㗎，遲下會話大家知，一個演唱會有雙黃蓮蓉月+波鞋送，係咪好抵？哈哈！講笑啫！」
是次演唱會名稱，簡簡單單名為 保誠保險呈獻《洪嘉豪 Kaho Live 2024》，KAHO說是有特別意思：「我想用我個名去做人生第一次演唱會個題目，係想帶出一種鼓勵，『嘉豪』呢個名，係香港應該有千千萬萬個，平凡過咩咁，但係我希望大家唔好俾個名，限制咗自己，唔好覺得自己好平凡，就一定咩都做唔到，我都係由一個平凡人，勇於追求自己嘅夢想行到今日，終於可以第一次踏足紅館。」
「我係一個普通人，同大家一樣 ，平凡家庭出身，平凡的名字，平凡的樣子，平凡的歌聲，但只要懷抱住不平凡的夢想，我相信你同我一樣，無論做咩，永不放棄，都係會得嘅，行到去夢想之地。」
另一個夢想，KAHO是拍MV時實現：「最近我推出新歌《黑玻璃》，實現夢想去咗日本拍MV，又開到一架自己夢想中想揸下嘅車，呢架車我想揸埋上紅館，揸埋上台，哈哈！不過依家未知得唔得，高層話幫緊你幫緊你，諗吓。咁我喺公司效力咗咁多年， 我估揸到架車上台，最好係當長期服務獎送埋畀我啦，哈哈。」
Comments