藝人馬國明和湯洛雯自2020年公開戀情，並在早前宣布婚訊，直至昨日（30日）首次以未婚夫婦姿態出席活動。身穿白色禮服像預演婚禮的馬國明及湯洛雯，出席六福珠寶尖沙咀新店開幕活動時，自爆以老公老婆來自稱，對於婚禮籌備進度，湯洛雯心痛馬國明捱眼瞓陪她搞婚事：「之前佢拍劇瞓得兩、三個鐘，都陪我睇飾物。其實佢好好，成個過程都唔係不聞不問，就算佢瞓得好少，好多台詞要背都好，佢都會問吓：『點呀呢排？使唔使要我幫手？』其實好多嘢我都處理到，我覺得佢都唔夠瞓！」
直言正考慮在外地舉行婚禮的湯洛雯，被問到會否在香港補擺婚宴，她說：「考慮緊，會搞咗海外先，地點係秘密，會今年搞。」至於婚紗款式，馬國明說結婚當天可以性感，平時就不需要，湯洛雯說：「之前畀佢睇婚紗款式，可能係外國緍紗，佢覺得太勁太性感，仲揀緊，會尊重佢意願，正式嗰套婚紗唔會畀佢睇，結婚當天畀驚喜，總之唔會係驚嚇。」
馬國明大讚女友安排妥當，讓他可專心工作，對於被指很聽對方話，他說︰「我問得太多人，大家都話最幸福就係『當老婆開心，你就會好開心』，我都覺得好啱。」他承認有生育計劃，努力工作及儲錢，希望能進駐再大一點的愛巢，將來讓小朋友有多點空間，並承認間中去睇樓：「要睇下啱唔啱，唔會為買而買。如果近父母嗰邊就最好，因為將來計劃生小朋友，近父母就方便啲，始終我哋都要工作。」湯洛雯表示婚後不會立刻生育，先享受二人世界。
Comments