炎明熹19歲了！昨日（9日）踏入19歲生日的炎明熹（Gigi），雖然要為即將在九展舉行的《炎明熹 Gi-FORCE 演唱會 2024》準備，但日前特別抽空，和逾400位粉絲預祝，大搞以動物派對為主題的生日派對。以公主造型亮相的Gigi，和現場粉絲大玩連串遊戲，氣氛熱鬧。
於上周六（6日）舉行的生日派對中，所有出席的Gigi粉絲「Gi炎粉」和「小火苗」，為不影響Gigi開騷的狀態及健康，他們全部戴上口罩，並各出奇謀悉心打扮，化身為不同小動物，令現場頓變成動物園。
派對上Gigi以一身公主打扮亮相，其好朋友陳小姐則扮白馬王子，她們翹著手一同進場時全場興奮尖叫。Gigi說：「我本身第一個選擇唔係扮公主，但又冇頭緒扮乜，而今次生日會嘅主題係動物派對，好多粉絲都扮動物到場，而我前幾年拍節目有扮過公主，呢個公主本身個角色同動物好好感情，但今次條公主裙設計同上次有少少唔同，某程度都表達到我嘅改變，所以最後決定扮公主。」
為配合派對主題，Gigi拍攝了一輯以動物為主題的靚相，除了抱著貓貓合照，更與蜥蜴、杜比亞蟑螂一起拍照。現場粉絲看到Gigi手持杜比亞蟑螂把玩的相片，嚇得嘩聲四起。Gigi其實很大膽，跟粉絲玩估盲盒遊戲時，台下的粉絲遠距離見到箱內有疑似蜥蜴和青蛙，當Gigi毫不猶豫伸手入箱時，粉絲即尖叫，其實箱內的是假動物！Gigi說：「剛才伸隻手入箱，我真係唔知裡面係乜，亦都唔知入面嘅嘢係生定假，但細個睇電視節目，有見過呢個遊戲，好想可以玩吓，估唔到今日19歲生日會，可以嘗試得到，我都算偏大膽，連我屋企人都話係。」
除了玩遊戲，更有不少精彩節目包括動物catwalk比賽，由Gigi做評判，選出最佳造型及最佳台風獎項。問到最喜歡那個環節，她說：「盲盒係一個幾驚喜嘅環節，但講到最暖心，係見到大家一齊為我表演嘅每一幕，今日天氣其實有啲熱同焗，見到佢哋為咗呢個生日會去扮動物、準備表演環節，非常暖心，平日係佢哋睇我表演，今日我喺台下睇番佢哋表演，感覺好神奇。」
Gigi續說十分感謝見證及陪伴她成長的粉絲：「我會盡力地唔會辜負大家對我嘅期望，希望大家可以繼續陪住我，為我加油，做我最堅實嘅後援。一人難順百人意，百人難順一人心，但我都會盡力去做，希望大家可以俾多啲意見我，好多謝你哋寫俾我嘅信，我會睇，之後收埋，希望將來有多幾個月餅罐俾我收埋呢啲信。」
另外，昨日生日正日時，Gigi是綵排演唱會中度過。令她驚喜的，是Gigi到Band房練歌時，演唱會音樂總監周錫漢（Randy）率領他的音樂團隊，以及新加入的成員Felix林智樂，送上生日蛋糕，Randy祝快高長大及學業進步，Felix則送上金算盤，預祝她可以賺錢買到十層樓。晚上Gigi到排舞室練舞，舞蹈總監林文輝與舞蹈員也準備生日蛋糕，蛋糕上更寫上「炎師傅 生日快樂」，原來因Gigi在演唱會要打後空翻，練「舞」如練「武」，故被稱為「炎師傅」。
生日要在工作中渡過，Gigi說不介意，最在意的反而是自己的演出狀態：「生日正日要band rehearsal，希望有一個好嘅狀態去迎接演唱會，因為早排病過，聲帶未完全回復最好嘅狀態，希望吸引力法則，把聲可以好番晒，個狀態可以一直好到去演唱會之後。」
Comments