歌手炎明熹（Gigi）為下月的首個個人演唱會火熱籌備中，同時也要適應大學生活，但也不忘為善最樂的原則，日前和8位粉絲到餅房炮製月餅，希望能為「浪浪」即流浪動物出一分力！ 原來Gigi的歌迷會為慶祝Gigi出道兩周年，將在本月16日及17日舉辦「Gigi炎明熹出道2週年慶祝活動慈善義賣嘉年華」，當日會發售限量精品包括Gigi親繪的布袋、Gigi的簽名海報外，更會推出Gigi親製的月餅，收益在扣除開支後，全數撥捐「沙律貓狗之家」，為流浪動物機構籌款，屆時Gigi會現身嘉年華幫手義賣。
Gigi說：「我好鍾意動物，但做主人好大責任，我又要兼顧學業，暫時未係適當時候，但我一定會支持領養，好開心今次歌迷會有呢個安排，可以一齊幫助流浪動物。最辛苦係歌迷會，花咗好多時間搞今次活動，當日會有攤位遊戲，又有打卡佈置，仲有個2米高嘅Gi囡公仔俾fans影相，到時我會落去幫手，因為中秋節正日（廿九日）我應該要閉關準備演唱會，嗰日可以同fans提早慶祝中秋節。」
Gigi首次做月餅，坦言製作時有點戰戰兢兢，尤其要準確地預備材料的份量，每一個步驟都不容有失。由搓餡、做皮、倒模、以至掃蛋醬入焗爐，Gigi都有參與，歌迷會更特別訂製了圍裙給她，上面印有模仿Gigi樣貌設計的公仔「Gi囡」，當穿起圍裙時，Gigi也忍不住說：「我好似大廚！」
Gigi說：「因為第一次做，所以有啲手忙腳亂，加上每個步驟唔可以急、亦唔可以錯，需要好大嘅耐性同記性。好在現場有老師一步一步教我同fans應該點做，我哋會義賣一百盒，每盒有四個，售價$218，流心奶黃係主打，仲會混合芝麻味同柚子味，我有試食，特別鍾意柚子味，少有啲，好好味，fans仲好細心，設計咗幾款餅模，其中一個仲係歌迷會嘅logo。」
當日歌迷會更安排一部爆谷機，恭賀Gigi兩場演唱會爆賣，她說：「嗰日好多第一次，第一次做月餅，第一次整爆谷俾自己同fans一齊食，但我唔敢食太多，因為要好好保護把聲，不過整爆谷好好玩，睇住佢爆開，心情原來會好興奮。」
Comments