2018年11月3日，12位素人在一個商場小舞台上宣布組團MIRROR，5年後的今天，MIRROR已是在各大舞台上全城最紅的男團。過去1800天，12子有着非一般的人生旅程，將來的路又是如何？MIRROR紀念成軍5周年的團歌《Catch A Vibe》，令12子又走在一起，畢竟各有各忙，努力拼勁，相處模式大不同，然而此歌也代表他們已有默契的相處方式：把握及享受當下快樂的一刻。
在《Catch A Vibe》中，12子大玩角色扮演，充滿喜感，如姜濤扮演看更，看守Stanley與Jeremy所扮的蠟像；AK成為80年代電視Game Show主持人，與參賽者Frankie、Jer及Tiger玩搶答遊戲；𢦀直但精神有問題的科學家Anson Lo，與冇記性的科學家Ian，活捉落街買餸的Edan去做實驗；速遞員Alton搬運貨物，Lokman為要扮貨物，要困1.2米高的箱中！
成軍5周年，12子對未來各有期盼及想法，當中更是令人意想不到！Jer、Edan、姜濤、Alton及Stanley異口同聲說想到世界各地表演，Jer：「俾其他海外Fans睇到MIRROR開Show係點樣。」Edan：「一方面海外Fans終於可以親眼睇到我哋嘅演出，二來又好似旅行，去下其他地方都幾開心。」姜濤：「開海外嘅演唱會啦！大家都未試過。」
至於Tiger、Anson Lo及Frankie則想做舞台劇或音樂劇，Lokman則說：「我哋可以做啲反傳統嘅嘢，我哋成日做好正能量、繽紛嘅歌，可以試做啲好惡嘅歌，或者係聲嘶力竭、慘情嘅歌，對我哋嚟講都會多一種感覺。」至於Ian的期盼是最有趣：「希望MIRROR啲Crew飯好食啲，膳食可以有突破。」
MIRROR走到今天，絕對是鏡粉的功勞，連綿不斷的支持，令12子可以走得更遠。一人一句，給粉絲的真心話。
Jer：好多謝每位Fans，由比賽開始我哋只係Nobody嘅時候就一直支持到而家，好多謝大家嘅陪伴，我哋先有力量去做更多作品俾大家。
Tiger：都唔明白點解會有人喜歡我哋呢12個人，真係沿途高低伴我走過，好多粉絲朋友都係不離不棄，令到我哋有機會同能力喺呢個行業行落去。
AK：多謝Fans五年嚟嘅支持同埋愛，冇你哋，我哋冇可能行到嚟呢一步，希望嚟緊日子大家可以用一個最舒服嘅心，最開心嘅狀態去追你哋嘅星啦！
Frankie：多謝Fans嘅包容，同埋無條件付出嘅愛，亦多謝一路以嚟同我哋講過唔好說話嘅Fans或者Haters，呢啲會令我哋反醒，Keep住改進。
Jeremy：堅持係好難，但Fans到而家都一路咁支持我哋，都真係好鍾意我哋先做到，所以真係好多謝大家。
Stanley：呢啲嘢唔能夠用說話講，只能夠好俾心機做每一個作品，好努力去報答佢哋。
姜濤：用作品說話。
Ian：除咗感激都係感激，成日都覺得如果冇大家嘅支持，都冇而家嘅我哋，做好多嘢都冇人同我哋分享，冇咗嗰個意義。
Edan：五年喇！都絕對唔係三分鐘熱度，大家都真係好有愛，先可以支持我哋咁耐，希望我哋可以回饋返你哋，繼續努力。
Anson Lo：呢五年有新Fans亦有一直支持嘅舊Fans，每位都同樣重要，呢五、六年好似坐過山車有開心唔開心，但大家依然默默守候，呢樣係每一日都好感謝。
Alton：MIRROR嘅存在，都因為Fans同埋普羅大眾有份參與呢件事，先至有呢個位置，衷心向每一位講聲多謝，希望以後多啲輸出，做多啲唔同作品俾大家睇。
Lokman：同大家距離遠咗，對Fans有少少虧欠，我哋直接表達俾大家嘅愛又間接咗，初出道會多少少影相、傾偈嘅機會，可以望住大家眼睛交流，而家只可以喺舞台透過能量發送，多謝大家嘅體諒，喺咁嘅情況下仍然無私愛我哋。
Comentarios