樂壇天王張學友接受香港電台節目《香港機遇》訪問，談及家庭生活時，他笑言自己在家中的地位低微，地位最高是太太羅美薇：「我永遠都係最後一位，屋企隻龜仲高級過我，我幫佢抹屎、餵佢，幫佢洗籠。第一我太太、跟住我兩個女、我媽媽、隻狗。可能我再排後啲，隨時加多隻龜或者生龜蛋。」
他更說自己絕非嚴父，是佛系教女︰「我主要畀意見，接唔接受係佢哋嘅事，我都有我嘅睇法，衣著又好、談吐又好、佢哋對將來睇法都好，我都唔會強迫佢哋，佢哋冇意見畀我，因為佢哋費事啋我，哈哈！」
談及現時香港樂壇發展，張學友說時下的新人，會比他那一代辛苦，但同時十分欣賞及佩服這班新人們：「我哋以前有好多空間，可以邊學邊做，所謂空間就係你真係唱得唔好，或者跳得唔好，啲人仲會話：『慢慢嚟啦！』而家嘅新人一出嚟，跳舞跳到嘭嘭聲，個個都係郭富城，佢哋一出嚟就要已經準備好，我覺得佢哋依家犀利啲。」
有趣的是，當提到其招牌台風「蘭花手」時，他說不懂示範：「其實係不自覺，你叫我示範都唔知點。純綷係緊張，隻手唔知點做，其實係不自覺嘅動作，因為我個人比較悶，所以啲人見到比較特別嘅嘢就『嘩』，覺得好特別。」
昔日張學友在樂壇及影壇兩邊走，他說源於「未搵夠」難：「唱歌收入唔穩定，唔知係咪可以維持生活，但拍一部戲，我知道幾多錢，例如一年我接咗七部戲，我就知嗰年收入有幾多，所以有段時間，拍戲係我主要收入，後來做演唱會嘅機會多咗，收入有保障，咁我就變咗得閒就拍吓。」
張學友更自爆近年收入全無，投資亦傾向保守，現時持有的物業，都是用作自住而非投資，又大嘆做業主不易：「所有冇自用嘅物業我都賣返晒出去，倉庫也好，住又好，寫字樓又好，都係自己買嚟用。我覺得租畀人好辛苦，窗漏水又關我事，明明打風唔關我事，佢漏水、樓上漏水又關你事，水渠爆咗又係你去整，我份人冇乜安全感，我係要好大安全感。」他更自爆防止腦部退化的妙法是打機：「我玩嚟玩去都係嗰幾隻，例如數獨，主要訓練我個腦唔好咁快退化，例如數獨嗰啲。」
Comments