郭富城、任賢齊和林家棟昨日在將軍澳的學校宣傳賀歲片《臨時劫案》，和扮財神的符家浚坐的士出場，現場更有導演麥啟光、孫佳君、林雪、曾比特、張松枝、ANSONBEAN和王頌茵，並跟現場數十名長者和學生玩遊戲及派禮物。
城城說在《臨》片中演悍匪，造型更要變醜要戴假哨牙，更言做演員需要付出，可以放低偶像包袱：「戴假哨牙演戲會有咬字問題，拍攝長時間都好攰。」小齊和林家棟則指城城變「哨牙仔」後狂噴口水，林家棟笑說：「有冇睇過《異形》？異形滴口水絲，城城都係咁！」小齊笑說跟城城有多場對手戲，常被噴到一臉口水。
而城城則說首次和小齊合作感到興奮，雖相識已久，並常在活動中碰頭：「我哋拍戲時，交流同溝通得好開心，好似舊朋友敘舊，小齊係一個好好嘅演員」
另外，林家棟說他和城城及小齊，在戲中要面對男人之苦，包括婆媳糾紛及男人最怕的前列腺問題，被問到會否有共鳴，他笑說：「我前列腺冇事喎！不過以前經歷過女友要求二人世界，未必肯同未來奶奶一齊住。（所以你主動分手？）唔好咁講，可能因為咁，我被佢飛呢！」
城城則說現實生活中，在不同階段所面對的挑戰都不同，現時要學習遷就一對寶貝女：「自從做咗爸爸就要遷就囡囡，有時小朋友發脾氣又唔聽話，氹佢哋開心又唔成功，搞到好崩潰，但都要接受，呢個亦係個磨練。」
至於小齊則說其角色性格如其名曲《心太軟》一樣，凡事都孭上身，但現實中的他不會太心軟：「我唔係好軟，男人應該硬嘅地方都好硬，肝就唔好太硬。」
小齊去年完成43場巡迴演唱會，有指他豪擲100萬元給工作人員作鼓勵，獲封「絕世好老闆」的小齊說：「我平時好刻薄佢哋，所以今次係一個補償，同埋大家做得辛苦，畀佢哋好好食餐飯。」正開巡唱的城城，說有意效法小齊：「小齊做法值得學習，過往我哋都有現金抽獎，抽電話、酒，爭在未有抽車」。
Commentaires