「唱作王子」馮允謙（Jay Fung）將於下月舉行入行以來首個紅館演唱會《JAYPOP LIVE@COLISEUM 馮允謙演唱會 2023》，開騷前推出演唱會主題曲《入場人士注意》，更是2023年首支派台歌，身兼作曲、填詞和監製的他，邀請陳考威、SeaTravel、Oscar和Young Hysan等合力打造。至於在MV中他化身開心博士，研製「快樂菌」散播全世界，望以正能量拯救大家。
Jay說： 「今次個MV故事同演唱會主旨好相似，喺MV裏面嘅我係個發明家，見到世界變到好壞，啲人唔開心，所以發明快樂病毒，感染所有人。我希望入嚟睇演唱會嘅觀眾都感染到，好投入我個騷，變得更快樂！雖然喺MV唔使跳舞，但有一組動作，喺MV裏面不停做。我希望到時喺演唱會上，觀眾都可以同我一齊做，一齊投入呢首歌，感染快樂氣氛。」
拍攝MV當日有大約20位喪屍妝扮的演員參與演出，他們由酒吧場景、滾軸溜冰場、實驗室追到街頭，期間Jay更向導演自薦，以喪屍妝壓軸亮相。雖拍了十多個小時，但Jay全程與他們打成一片，Jay收工離場前，和眾演員影大合照後，他們更高呼：「JayFung！JayFung！」以送他離場。
演唱會舉行前，Jay飛往加拿大探望父母，共聚天倫叉足電：「今次只係休息咗幾日，我當然好想再放長啲假期，真係太耐無放長假。不過我都好感恩，開騷前竟然有假放喎。休息完返嚟，個腦好清清晰，工作更加投入，我又再充滿力量！」
Comentários