




憑電影《破‧地獄》角逐今屆金像獎最佳女主角殊榮的衛詩雅,昨日(16日)與拍拖兩年半的醫美醫生男友周祉安結婚,踏進人生另一新篇章。一對新人先在下午時份,於半山聖母無原罪主教座堂舉行婚禮,晚上於金鐘香格里拉格酒店筵開24席。
來教堂觀禮嘉賓眾多,包括英皇娛樂老闆楊受成博士、經理人霍汶希、陳家樂太太連詩雅、Gin Lee、關智斌、導演陳茂賢等。至於在酒店舉行婚宴時,賓客陣容星光熠熠,包括容祖兒、蔡卓妍、方中信、歐陽震華、周勵淇、談善言、朱柏康、韋羅莎、梁雍婷、連詩雅等。衛詩雅的姊妹團陣容中,陳家樂反串做姊妹,笑指自己有特別任務,就是幫姊妹團成員周家怡找另一半,從新郎身邊的醫生筍盤着手,又指周家怡搶花球唔爭氣。
衛詩雅和丈夫在酒店現場接受訪問,由於下個月會再搞婚宴,她直言結婚真的很累:「今朝完咗教堂部份,都已經冇晒力,攝影師話最辛苦嗰Part都未開始,今晚先最辛苦,但我𠵱家最緊張,第一次同周生一齊做訪問,有啲緊張,未習慣叫老公,頭先要搵奶奶講嘢,我話:『Auntie』,佢話改名呀,一時間要改稱呼。」
周祉安表示已改口叫Michelle做「老婆大人」:「我自己加『大人』,應該嘅。我好感激佢愛我,呢個係真嘅,佢係好善良嘅人,教識我好多嘢,包括用愛去包容好多事情,無論開心唔開心,都盡量用大愛態度,同佢會一齊最主要嘅原因,係因為價值觀非常相似,咁樣先可以一齊行埋餘生道路。其實喺教堂時緊張啲,我每次Rehearsal讀誓詞,唔知點解都會眼濕濕,但本身我係好少喊嘅人,嗰段誓詞係好莊嚴,尤其是喺神父及親友面前宣誓,我相信我係會負一世嘅責任。」
問到婚後是不是「聽晒老婆話?」周祉安說:「係呀,老婆大人呀嘛。」至於收入是否要「上繳中央」即全交老婆大人?他說:「應該係啦。」衛詩雅聞言即說:「好喎!好喎!」周祉安笑說每個月拎零用錢來食飯搭車就可以。衛詩雅和周祉安異口同聲指長輩沒有催生BB,衛詩雅說:「我家人同佢家人好開通,暫時都未有呢個打算,有嘅時候會第一時間通知大家。」
衛詩雅自爆行禮時有蝦碌位:「喺教堂爸爸要幫我戴頭紗時,我忍唔住喊,反而宣讀誓詞時太緊張,驚唔記得對白。戴戒指時我戴錯手,我幫佢戴嗰陣,神父話戴另外一隻手,我話Sorry﹗」周祉安即說:「其實我唔啱,我舉錯隻右手畀你,神父話左手呀﹗」
衛詩雅說哭得最勁是結婚前一晚:「我反而喊得最犀利係昨晚,回顧做女嘅感受,分別send咗畀爹哋同媽咪一段說話,我畀自己文字感動,周生行出廳呆咗望我,問我喊乜嘢?佢話其實你返屋企半個鐘,你唔係嫁隔籬村。」
衛詩雅續說暫時未有度蜜月的時間表,或者在金像獎頒獎禮後才去,至於丈夫周祉安是否陪同出席,他說:「睇老婆大人吩咐,佢叫我去就去,唔去就唔去。我希望見證到佢攞獎,有幻想呢個畫面。」
下月衛詩雅舉行的婚以中式為主,她說:「上頭儀式未做,冇辦法,又唔係好識,二嚟中式同西式分開,到時再玩。今日冇得着褂,期待着褂。」周祉安說:「老婆大人好就我,我本身係天主教,想喺church行禮,佢唔係教友,其實可以選擇唔喺教堂,但佢好Respect我。喺教堂行禮複雜啲,要見神父同執事,好多唔同程序,用幾個月時間預備,比起今日準備仲多,但佢好好,畀個心陪我做呢樣嘢,好感激佢。」